A Nanni Sulis  (III)

 

Guai si avanzes. Para,

falche ingrata. Non creo

chi nde cherzas messare unu fiore.

Porca assassina, nara:

forzis non bi so deo

lottende in d'unu mare de dolore?

Abbrevia sa mia

terribile agonia

ma salva custu gravellu de amore;

salva custu gentile

lizu, s'est chi non ses ingrata e vile.

 

Tue, o Crocifissu,

si la podes suspender,

para de Nanni sas afflissiones.

Ca si bocchis a issu

guai!, has a intender

dae me funestas malediziones.

In sa celebre isfera

sa mia preghiera

accetta: custu lizu non abbandones,

provvedi prontamente,

o salvalu o non ses onnipotente.

 

E tue, dulche Maria,

isposa e mamma 'e Deu,

piedade ti prego, piedade;

tue ses bona e pia,

salva s'amigu meu,

salva s'amigu meu,

salva s'amigu meu, unicu frade.

Prîte non ti presentas

a Deus e ti lamentas

a issu pro sa trista infermidade

chi est bocchinde a chie

bisonzat sanu a seppellire a mie?